Aktualisiert am 01.06.2010
Wi snackt platt
För jo up platt
Van Hinni Trauernicht ut Spetz
Aus dem Archiv von Wilfried Janßen
Verleeden Week harr Elke Renken ut Marx hier de Bomen bi d’ Kopp. Se hett recht: November- un Oktobermaant sünd de Bladenmaanten. Nettsowat elke Boom of Busk mit Bladen smitt sien Loov of. Novembermaant is ok de Maant mit de Gedenkdagen: Volkstrürdag un Ewigkeitssönndag. De Vergänglichkeit van disse Welt hebben wi vör d’ Ogen: As dood stonnen de Bomen un Busken vör uns. Un wat is dat mit dat Bladenharken för ’n Arbeid, bit dat sowiet is! Besünners för de Fehntjers, de alltied kittig un mehr as genau sünd! In Septembermaant geiht dat al los. Wenn de eerste Bladen van de Bomen fallen, is mien Ollske futt mit de Hark bi d’ Hand. Un denn geiht dat eerst recht los! Oktober un November: Eerst sünd de Bladen an de Bomen rund um uns Huus noch moi rood, geel of bruun. Wat `n mojen bunten Spektakel! Aver denn… Mit `n Susen un Brusen trecken de eerste Störms in Harvst over dat Land. Un denn de eerste Nachtfrösten. Nett as wenn dat sniejen deit, fallen de Bladen van de Bomen. Van de Rasen is nix mehr to sehn. Bladen, Bladen, Bladen, wohen dat Oog ok kieken deiht. Man nu geiht dat d’r bilangs: Mien Ollske is nich to bremsen. Jack an, de Foten in Stevels, Mütz up Kopp, Handschen an, de Hark grepen: De Slacht gegen de Bladen is anfangen, de Jagd is freei! Sünner Gnade word dat bunt’ Gaudje in Sacken stoppt. Sweet löppt mien Froo ut ’t Gesicht. Laat di kien Swagheid wiesen! geiht hör dat dör de Kopp. Wieder, wieder! Dor sünd noch so völ Bladen… man worhen mit de hele Bladen? Ik hebb in disse Dagen ’n nejen Komposter baud. Blot för de Bladen. Na Stünnen is de eerste Slacht wunnen. Man anner Mörgen: „Dat liggt ja weer all vull!“ hör ik, as wi buten Dör kieken. „Un Nahber harkt ok kien Bladen, de sünd mit Wind all hier herweiht!“ Man mit leverlaa word de bunt Pracht an de Bomen al minner – ok in d’ Nahberskup. Noch dree, veer Slachten, un dat Wark hett `n Enn. Gottseidank. Bomen un Busken hollen Winterslaap. Anner Fröhjahr grönt un bleiht dat weer. Man denn heet dat ok weer: Rasen maihen! So ’n Tuun in Oostfreesland un besünners up Fehn mutt alltied kittig wesen…
_____________________________________________________________________
Gästebuch
_____________________________________________________________________
Stephan Janßen
E-Mail: » WebDesignAsel
Es waren schon
Besucher auf dieser Seite